د تکواندو اسیايي سیالۍ د روانې اوونۍ په پنجشنبه د منګولیا په کوربتوب پیلېږي، چې افغانستان هم پکې د خپلې اته کسیزې ملي لوبډلې په ګډون برخه اخلي.
د معلوماتو له مخې، د افغانستان د تکواندو ملي لوبډله پرون دوشنبه منګولیا ته روانه شوه. په دې لوبډله کې شپږ ورزشکاران او دوه روزونکي شامل دي.
د تکواندو اسیايي سیالۍ د روانې میاشتې تر ۲۵مې دوام کوي
ټاکل شوې ده چې د تکواندو اسیايي سیالۍ د روانې میلادي میاشتې له ۲۱مې نېټې پیل او د ۲۵مې نېټې پورې دوام وکړي.
په دغو سیالیو کې د اسیا د بېلابېلو هېوادونو ورزشکاران برخه اخلي او افغانستان هڅه کوي په دې نړیوالو سیالیو کې د پام وړ پایلې خپلې کړي.
افغان ورزشکارانو ته د بریا هیلې څرګندې شوې
افغان لوبغاړو له سفر وړاندې د طالبانو د ورزش ادارې له عمومي رئیس مولوي احمدالله وثیق او د فني او مسلکي چارو له مرستیال حافظ احمدجان ځدراڼ سره لیدلي دي.
په دې لیدنه کې ورزشکارانو ته د ښه ځلیدو او بریا هیلې څرګندې شوې.
محسن رضایي د جراحي عملیاتو له امله له سفر پاتې شو
د تکواندو ملي لوبډلې مشر روزونکي محمد بشیر ترهکي ویلي، د لوبډلمشر محسن رضایي د جراحي عملیاتو له امله ونه شو کولای له لوبډلې سره سفر وکړي.
د تکواندو اسیايي سیالۍ د افغان ورزشکارانو لپاره مهم فرصت بلل کېږي، څو په نړیواله کچه خپل استعدادونه وښيي.
