د ګوانتانامو اووه کلن بیندیان له زندان ازاد او نن کابل ته ستانه شول
![guantanamo](https://afghannow.net/wp-content/uploads/2024/02/Guantanamo-780x470.jpg)
د کوانتانامو اووه کلن بندیان نن سهار کابل ته راورسېدل او طالبانو یې تود هرکلی وکړ
د طالبانو د حکومت د کورنیو چارو وزارت وايي چې د ګوانتانامو په زندان ګې دوه پخواني افغان بندیان چې نږدې اوه کاله دمخه له دغه زندان څخه د خوشې کیدو وروسته په یو عربي هیواد کې نظربند وو کابل ته رسیدلي دي.
دغه وزارت د دوشنبې په ورځ فبرورۍ ۱۲( سلواغې ۲۳) ویلي چې ملا عبدالظاهر صابراو عبدالکریم نن سهار د فلای دبۍ د هوايي کرښې په یوه الوتنه کې د کابل هوايي ډګر ته رسیدلي دي.
یو بندي د لوګر او بل د خوست دی
د دغه وزارت ویاند عبدالمتین قانع د یکشنبې د ورځې په ماښام د ایکس په ټولنیزه شبکه کې لیکلي و چې، ملا عبدالظاهر صابر د لوګر ولایت د مرکز او عبدالکریم د خوست ولایت د تڼیو ولسوالۍ اوسېدونکي دی.
![guantanamo۱](https://afghannow.net/wp-content/uploads/2024/02/Guantanamo۱-300x170.jpg)
د ښاغلي قانع د معلومات له مخې ملا عبدالظاهر صابر د امریکايي ځواکونو له خوا په ۲۰۰۲ کال کې د نیولو وروسته د بګرام هوايي ډګر زندان ته استول شوي وو او په دغه زندان کې د څلورو میاشتو تیرولو وروسته بیا د ګوانتانامو زندان ته انتقال شوی وو.
نور ولولئ:طالبان کابل کې د ‘دیني عالمانو او قومي مشرانو مشورتي’ غونډه جوړوي
نور ولولئ: اسدالله هارون: له کوم جرم پرته پنځلس کاله په ګوانټانامو کې بندي وم
نور ولولئ: ګوانتانامو کې د رمزي بن الشیبه محاکمه ولې وځنډېده؟
همداشان عبدالکریم د ۲۰۰۲ کال د اګست په میاشت کې په پاکستان کې ددغه هیواد امنیتي ځواکونو له خوا نیول شوی و چې بیا د ۲۰۰۳ کال په لومړیو کې د ګوانتانامو زندان ته انتقال شوی وو.
د طالبانو د حکومت د کورنیو چارو وزارت د ویاند د معلوماتو له مخې دا دواړه په ۲۰۱۷ کال کې د ګوانتانامو له زندان څخه خوشي شوي واو عمان سلطنت ته د څارنې لپاره سپارل شوي وو.
هغه ویلي:” په عمان کې یې اوه کاله د سفر د اجازې پرته تر څارنې لاندې تیر کړي چې د افغانستان اسلامي امارت (طالبانو حکومت) د هڅو په پایله کې لګیدلي محدودیتونه رفع شوی دي”.
![guantanamo۲](https://afghannow.net/wp-content/uploads/2024/02/Guantanamo۲-300x170.jpg)
د کوانتانامو زندان د جوړېدو په اړه
امریکا متحده ایالاتو ځواکونو په افغانستان کې د ۲۰۰۱ کال د نومبرمیاشتې په اومه د پوځي عملیاتود پیل وروسته د ۲۰۰۲ کال د جنورۍ په یوولسمه کیوبا کې د امریکا په بحري اډه کې القاعدې او نورو تروریستي ډلو سره د اړیکو په تور د نیول شویو کسانو د ساتنې لپاره د ګوانتانامو زندان پرانیستی وو.
په دغه زندان کې یو مهال تر ۸۰۰ پورې بندیان د سختو امنیتي شرایطو لاندې ساتل کیدل، خو د راپورونو له مخې اوس په دغه زندان کې یوازې ۳۰ تنه پاتې دي.
په یاد زندان کې د طالبانو اوسني اکثره لوړ پوړي چارواکو زنداني وو.