شنونکي وايي چې طالبان ځکه په دغه نړیواله غونډه کې حاضر نه شول چې افغان مدني ټولنو او ښځو ته د ځواب ویلو نه وو
په نړیواله، سیمه ییزه او محلي کچه د طالبانو پر ښځو ضد تګلارو سختې نیوکې شوي او لا هم کېږي، خو د دوحې دغه وروسته ناسته چې د افغانستان په اړه د ملګرو ملتونو تر مشرۍ لاندې جوړه شوي وه؛ افغان مېرمنو ته ښه فرصت و چې خپله غږ نړیوالو ته ورسوي او طالبان له همدې ویرې په یاده غونډه کې حاضر نه شول.
په دې اړه د افغانستان د بشري حقونو پخوانۍ فعاله شهرزاد اکبر وايي چې طالبان د مدني ټولنې له پنځو غړو سره د مخامخ کېدو جرائت نه لري.
په رسمیت د طالبانو نه پېژندل
د افغانستان د بشري حقونو د خپلواک کمېسیون پخوانۍ مشره وایي، چې د دوحې په ناسته کې د افغانستان د مدني ټولنې د استازو شتون په دې معنا دی، چې نړۍ طالبان په رسمیت نه پېژني.
د نوموړې په خبره؛ طالبان په کور دننه او بهر کې خلکو ته د ځواب ویلو لپاره حاضر نه دي.
نور ولولئ: طالبان د دوحې ناستې له اجنډا خبر نه لري
نور ولولئ: د دوحې په غونډه کې محبوبه سراج وايي، طالبان ښځو ته سپکاوی کوي
نور ولولئ: تادامیچي: طالبان باید د نجونو د زدهکړو او ټولشمولیت په اړه رښتینی فکر وکړي
د دوحې روانې ناستې ته چې د طالبانو استازي هم بلل شوي وو، دغې ډلې د ملګرو ملتونو له خوا د خپلو شرطونو د منل کېدو له امله له برخې اخېستو ډډه وکړه.
یادې غونډې ته د طالبانو بلل کېدل او بیا په دې ناسته کې د دوی نه ګډون له پراخو غبرګونونو سره مخ شوی دی.
د افغان مېرمنو د حقونو غوښتنه
د دغو غبرګونونو په دوام د دوحې ناستې په درشل کې لسګونو سازمانونو او ښځينه فعالانو د افغانستان لپاره د هېوادونو ځانګړو استازو ته د لیکونو په استولو سره ویلي، چې د ښځو حقونو ته دې د دوحې په ناسته کې لومړیتوب ورکړل شي.
د بشري حقونو دغو فعالانو همداراز په افغانستان کې د جنسیتي توپیر د رسمیت پېژندنې غوښتنه هم کړې ده.
اخوا د بشري حقونو یو شمېر فعالان او د دوحې ناستې ځيني ګډون کوونکي وايي، چې دا ناسته د طالبانو لپاره ښه فرصت و؛ خو دوی دغه فرصت له لاسه ورکړ او کېدای شي بیا داسې فرصت په سخته په لاس ورشي.
د یادونې وړ ده چې دغه غونډه د ۲۵ هېوادونو د استازو تر منځ د پردې تر شا روانه وه، او ګوترېش ویلي چې د افغانستان په تړاو په کې مهمې پرېکړې شوي دي.
