له مسکو د کابل غوښتنه دا ده چې له افغانستان سره سوداګریزې او اقتصادي اړیکې پراخې او د پانګونې، انرژۍ، ترانزیټ او بانکي اسانتیاوو په برخو کې عملي همکارۍ زیاتې کړي.
د اسلامي امارت د بهرنیو چارو وزیر امیرخان متقي په مسکو کې د روسیې د لومړي وزیر له مرستیال الکسي اوورچوک سره کتلي او د دواړو هېوادونو ترمنځ یې د اقتصادي اړیکو پر پراختیا خبرې کړې دي.
د بهرنیو چارو وزارت وايي، په دې کتنه کې د سیاسي، اقتصادي، سوداګریزو، ترانزیټي او انرژۍ همکاریو پر پراختیا بحث شوی دی.
له مسکو د کابل غوښتنه پر اقتصادي همکاریو متمرکزه ده
متقي د افغانستان او روسیې د سیاسي اړیکو مثبت مسیر ته په اشارې ویلي، د دواړو هېوادونو ترمنځ موجود سیاسي تفاهم باید پر عملي اقتصادي شراکت بدل شي.
نوموړي د سوداګرۍ پر پراختیا، ترانزیټ او سیمهییز اتصال هم ټینګار کړی او په افغانستان کې یې د روسیې د پانګونې د زیاتېدو غوښتنه کړې ده.
د انرژۍ او کانونو په برخو کې ګډې همکارۍ او د بانکي او تادیاتو د اسانتیاوو رامنځته کول هم د متقي له خوا مطرح شوي دي.
له مسکو د کابل غوښتنه او د روسیې غبرګون
الکسي اوورچوک له افغانستان سره د اقتصادي همکاریو پراختیا ته چمتووالی ښودلی او ویلي یې دي چې د عملي همکاریو د پیل لپاره مناسب شرایط برابر شوي دي.
نوموړي د ترانزیټ، ترانسپورټ، انرژۍ او نورو اقتصادي برخو کې د ګډ کار پر پراختیا ټینګار کړی دی.
اوورچوک د دواړو هېوادونو ترمنځ د سوداګرۍ زیاتوالي ته هم اشاره کړې او هیله یې څرګنده کړې چې په نږدې راتلونکې کې به عملي اقتصادي همکارۍ نورې هم پراخې شي.
له مسکو د کابل غوښتنه په داسې مهال مطرح کېږي چې افغانستان او روسیه د سیاسي اړیکو ترڅنګ د سوداګرۍ، پانګونې او سیمهییز اتصال په برخو کې هم د خپلو اړیکو د پراختیا هڅې کوي.
