دغه لوړ پوړی طالب چارواکی وايي، هیڅوک دا نشي ثابتولی چې پر چا علم فرض او پر چا نه دی
د طالبانو د بهرنیو چارو وزارت مرستیال بیا د افغان نجونو پر زدکړو له ټینګار سره وویل، هیڅوک دا نشي ثابتولی چې پر چا علم فرض او پر چا نه دی.
شېر محمد عباس ستانکزي نن کابل کې د نجونو د مدرسې د فراغت غونډې ته وویل، د یوه هېواد د پرمختګ یوازینۍ لار د ښځو او نارینه وو د علم زدکړه ده.
طالبانو په بیا واکمنېدو سره ګام پر ګام دنجونو پر عصري زدکړو بندیز لګولی خو مدرسې یې ورځ تر بلې زیاتوي.
د نجونو له زدکړو د عباس ستانکزي ملاتړ
ښاغلي ستانکزي د ځینې نورو طالب چارواکو برعکس چې پرمختللي زدکړې مباح ګڼي، په ځلونو د افغان نجونو د زدکړو په ملاتړ ټينګار کړی.
هغه یو ځل بیا په دغه پروګرام کې ویلي، چې علم پر نر او ښځه «فرض» دی.
د بهرنیو چارو وزارت سیاسي مرستیال همداراز وایي، د هېواد د اقتصادي، سیاسي، ټولنیزو او علمي چارو د پر پښو درولو او پرمختګ یوازینۍ لار زدکړې دي.
نور ولولئ: کمپاین کوونکي د ښځو د تعلیم مخنیوی غیر اسلامي بولي
نور ولولئ: د ښځینه زدهکوونکو انتظار ته ځواب شته؟
نور ولولئ: عباس ستانکزی د ښځو زدکړې واجب بولي
هغه د خپلو خبرو په یوه برخه کې وویل، له علم پرته هیڅ یو ملک پرمختګ نشي کولی او د علم دروازې باید خلاصې شي.
پر افغانستان د طالبانو له واکمنۍ وروسته له شپږمو ټولګیو پورته د ټولو نجونو پر مخ د ښوونځيو دروازې بندې شوې او تر هغه وروسته بیا د پوهنتونونو په ګډون د ټولو روزنیزو مرکزونو دروازې هم وتړل شوې.
د طالب رژیم چاوراکو ډاډ
که څه هم له څه باندې دوو کلونو راهیسې طالبانو د افغان نجونو پر زدکړو بندیزونه لګولي، خو ددې تر څنګ یې په هره غونډه، سیمنار، ورکشاپ او نورو راټولېدنو کې ویلي چې دوی د نجونو زدکړو ته ژمن دي او زمینه به برابروي.
تېر کال طالب رژیم ملت ته ډاډ ورکړ چې د نجونو د زدکړو په اړه پالیسۍ چمتو کوي، نو د څو کلونو په تېرېدو لا هم دوی نه دي توانېدلي چې د پالیسۍ جوړولو په اړه ملت ته وضاحت ورکړي.
خو افغان ملت او نړیوال بنسټونه بیا د طالب رژیم پر ژمنو باور نه کوي، ځکه په دې برخه کې یې تر اوسه د باور وړ ګام نه دی پورته کړی.
د یادولو ده چې طالبانو د واکمنۍ په خپله لومړۍ دوره کې هم د نجونو پر زدکړو او تعلیم کولو بندیزونه وضع کړي وو.
