د افغانستان د کرکټ تر ۱۹ کلنو کم عمره لوبډله د پاکستان لوبډلې سره لوبه لري

د غه سیالۍ چې په سوېلي افریقا کې د افغانستان په وخت د غرمې په ۱۲:۰۰ بجو ترسره کېږي ګټونکی ټیم به د یادو سیالیو نیمه پای‌لوبې ته لار پیدا کوي.

د د کرکټ ټیم مسؤلین وايي، افغانستان دغې سیالۍ ته بشپړ تیاری نیولی او هیله ده چې دغه سیالي وګټي.

د افغانستان د کرکټ بورډ ویاند فرید هوتک رسنیو ته وویل، د افغانستان د کرکټ تر ۱۹ کلنو کم عمره ټیم د دغه جام په سیالیو کې د ښه توپ اچونې، ښه توپ وهنې او ښه توپ نیونې په برخو کې وتوانېد، خپلو سیالو لوبډلو ته ماتې ورکړي او ځان د دغو سیالیو منځ‌لوبو ته ورسوي.

ښاغلي هوتک د افغانستان او پاکستان ترمنځ د کرکټ د نننۍ لوبې په اړه رسنیوته وویل: “د افغانستان لوبډله د نړیوال جام د سیالیو په لړ کې د کوارټر فاینل لوبه د پاکستان د کرکټ د ۱۹ کلنو پر وړاندې ترسره کوي. دغې لوبې ته افغان لوبډله پوره تیاری لري او تمه لرو چې په دې لوبه کې افغان لوبغاړي، وکولای شي ښې لاسته راوړنې ولري.”

د کرکټ د ۱۹ کلنو نړیوال جام د روان میلادي کال د جنورۍ په نیمايي کې د سوېلي افریقا د بینوني په ښار کې پیل شو.

د افغانستان د کرکټ بورد د معلوماتو له مخې د کرکټ په دغو سیالیو کې د نړۍ د ۱۶ هېوادونو د کرکټ تر ۱۹ کلنو کم عمره ټیمونو برخه اخیستې وه.

په دغو ټیمونو کې د افغانستان په ګډون اته ټیمونو چې نیوزیلاند، سوېلي افریقا، استرالیا، پاکستان، بنګله‌دېش، سریلانکا او وېسټ انډیز شامل وو، د یاد جام نیمه پای‌لوبې ته لاره وموندله.

د افغانستان تر ۱۹ کلنو کم عمره لوبډلې په سږني نړیوال جام کې تر دې دمه خپلې دوه لوبې چې یوه له کوربه جنوبي افریقا او بله له متحده عربي اماراتو سره وه، دواړه ګټلې دي.

د کرکټ مینه‌وال وايي، دا چې د افغانستان ټیم د کرکټ ۱۹ سیالیو په ۱۶ ټیمونو کې منځ‌لوبو ته ځان ورساوه، ډاډمن یو چې له پاکستان نه هم دغه لوبه ګټلی شي.

د کابل ښار اوسېدونکو دوو ځوانانو نورباز او عبدالباسط وویل: “د افغانستان د کرکټ ټیم اوس ډېر ښه شوی دی، کرکټ چې نن له پاکستان سره دی، موږ ډاډمن یو چې افغانستان‌یې ګټي.”

“د افغانستان د ۱۹ کلنو د کرکټ بېټنګ، بالېنګ او فیلډنګ درې واړه برخې ښه دي او دغه لوبه به وګټي.”

د افغانستان د کرکټ تر ۱۹ کلنو د کم عمره ټیم سر روزونکی رئیس خان احمدزی وایي چې دغه ټیم له یوه کال راهیسې دغو لوبو ته تمرینونه کړي او بشپر تیاری یې ورته نیولی و. د افغانستان د کرکټ تر ۱۹ کلنو د کم عمره ټیم مخکې تر دې څلور ځلې د پاکستان د کرکټ تر ۱۹ کلنو د کم عمره ټیم لوبډلې ته ماته ورکړې ده

د شهزاد په دوو سترو جامونو کې اړتیا

شهزاد ټولو ته معلوم دی چې د افغانستان زړور، برید کوونکی او نامتو توپ وهونکی دی.

هغه په اوپننګ کې ډېری وخت غوره کرکټ کړی دی او د افغانستان لپاره یې ډېر ښه اوپننګ نندارې ته وړاندې کړی دی.

خو په راروانو دوو جامونو (اسیا شل اوریز جام او نړیوال شل اوریز جام) کې افغان لوبډله ښه اوپننګ ته اړتیا لري او د دې چارې لپاره شهزاد وړ توپ وهونکی دی.

دا منو چې ځاځی اوپنر دی، دا منو چې عثمان غني اوپنر دی او دا هم منو چې ګربز اوپنر دی، خو د پخوانیو لوبغاړو له ډلې د شهزاد ښه والی دا دی، چې هغه د نړۍ ډېرو بالرانو سره مخ شوی، ډېر بالران یې هم په رسمي او هم یې په سوداګریزو لیګونو کې ټکولي دي.

د اوپننګ زړورتیا ورسره شته، د بنګله دېش، سریلانکا، پاکستان، هندوستان او د اسیایي لوبډلو بالران ټکوي.

په ۲۰۱۶م نړیوال شل اوریز جام کې یې د افریقا کایل اباټ او نور بالران وټکول، لوبډلې ته یې له اوپننګ خورا ښه سټارټ ورکړ او بالاخره د کرېس مورېس په توپ اوټ شو.

شهزاد په دې وروستیو کې د هېټېنګ ترڅنګ تخنیکي توپ وهنه هم کوله، په وېکټ د پاتې کېدلو فکر ورسره پېدا شوی و او دې چارې له ده سره ډېره مرسته وکړه، چې دې د نړۍ په غوره توپ وهونکو کې حساب کړي.

شهزاد محمدي د ۲۰۱۹م تر لومړیو پورې په شل اوریزو لوبو کې د لسو غوره توپ وهونکو په قطار کې و او حتا تر ویرات کولي هم مخکې و.

نسبت شهزاد محمدي ته رحمان الله ګربز، عثمان غني او ځاځی ښایي ښه ونه ځلېږي او د اسټرالیا پیچونه بیا تر اسیایي ویشتن ځایونو تېز دي.

اوسني ځوان لوبغاړي له اسټرالیا پیچونو سره ډېره بلدتیا نه لري او ښایي چې اوپننګ کې د بشپړ غړیتوب لرونکو توپ اچوونکو لخوا ستونزو سره مخ شي.

خو دا لوبغاړي هغه وخت بریالي کېدای شي، کله چې له نړیوال جام وړاندې دوی په اسټرالیا او یا هم نیوزیلېنډ کې تمریناتي لوبې وکړي، چې له کنډېشن او لوبډلو سره اشنا شي.

خو شهزاد محمدي بیا دا وړتیا لري، چې په چټکو ویشتن ځایونو ښه توپ وهنه وکړي او د اوپننګ له برخې افغان لوبډلې ته ښه سټارټ ورکړي.

نوو لوبغاړو ته مشوره

که نوي لوبغاړي په راروان شل اوریز جام کې مثبته لوبېدنه غواړي، باید تخنیکي شاټونه ووهي، لاین کې توپونو باندې د کراس شاټ وهلو هڅه ونه کړي، بلکې په ټایمېنګ سره یې سټرېټ یا مخامخ ولوبوي، خو که لاین توپونه له وېکټو پورته وي، باډي لاین یا شاټ پیچ وي، بیا نو توپ وهونکی کولای شي چې ځان ورته جوړ کړي او د پول شاټ په لوبولو سره په مېډ وېکټ، لانګ ان او یا هم سکوېر لېګ لورو ولوبوي او بونډریانې پرې راولي.

د دې ترڅنګ اپر کټ شاټونه، پنچ شاټ، شفل، لېټ کټ، پېډل او سکوپ شاټونه لوبول هم اړین وي.

یعنې توپ په کتو باید توپ ته همغسې شاټ انتخاب شي او په همغه ډول ولوبول، چې څنګه یې اړتیا وي.

خو دا چاره هغه مهال شونې ده، کله چې توپ وهونکی داسې مهارت سره لوبوته تللی وي.

ځوانو لوبغاړو لپاره ډاډه لوبېدنه؛ په ځان اعتماد؛ له لویو ټیمونو وېره نه کول او ذهني، فکري او فزیکي چمتو والی ډېر مهم دی.

اوس مونږ له شهزاد بل ښه اوپنر نه لرو، که شهزاد په اسیا جام کې وي، نو افغان لوبډله تر یوه ځایه رسولای شي.

له تاسو نظر اخلو، چې د شهزاد لوبول په راروانو دوو جامونو کې مثبت دي که منفي؟

تر هغې چې اسیا جام پېلېږي، باید شهزاد خپل فېټنېس او روغتیا ډاډمنه کړي.

شاوخوا ۸ میاشتې وروسته اسیا جام د پاکستان په کوربتوب ترسره کېږي، چې ترهغه وخته د شهزاد محمدي بندیز پای ته رسېږي او بېرته لوبډلې ته راستنېدای شي.

نړیوال شل اوریز جام کابو ۹ میاشتې وروسته په نومبر کې اسټرالیا کې ترسره کېږي.

که شهزاد په اسیا جام کې ځان ثابت کړي، کولای شي چې نړیوال جام کې ځان ته ځای ډاډمن کړي او هلته هم په ښې کارکرده ګۍ د افغانستان بېرغ له نورو لوبغاړ سره یو ځای ورپوي

کرکټ بورډ کې فساد نور هم زیات شوۍ

ای سي بي  یا افغان کرکیټ بورډ پر خپل ویبپاڼه ویلي، چي افغانستان د ځوانو لوبغاړو په رابرسېرولو کي تر ټولو هیوادودنو مخکښ هیواد دئ او هر کله د اړتیا او وړتیا له مخکي لوبغاړو ته په لوبډلو کي د لوبېدو چانس برابروي.

دغه اداره وايي، چي غوراوي کمېټه ئې د یوه سیسټم له لاري کار کوي، چي له مخي به ئې ځوانو لوبغاړو ته موقع برابریږي او په تدریجي ډول به د پخوانیو لوبغاړو ځای په افغان کرکیټ ملي لوبډله کي ځوانو لوبغاړو ته پرېښودل سي.

کرکیټ بورډ وروسته له هغه دا خبري کوي، چي پر ټولنیزو رسنیو ئې غوراوي کمېټه په دې له نیوکو سره مخ سوه، چي د ایرلینډ په وړاندي درو شل آوریزه سیالیو کي ئې لوبډله کي د نوي لوبغاړو پر ځای زړو لوبغاړو ته ځای ورکړی.

د ایرلینډ په وړاندي اعلان سوې لوبډله کي اصغر افغان لوبډلمشر، رحمان الله ګربز، حضرت الله ځاځی، کریم جنت، نجیب الله ځدران، محمد نبي، ګلبدین نایب، راشد خان مرستیال لوبډلمشر، نوین الحق، شاپور ځدران، مجیب الرحمن، قیس احمد، عظمت الله عمرزی، سمیع الله شینواری او عثمان غني شامل دي.

سمیع الله شینواری او شاپور ځدران هغه لوبغاړي دي، چي د کرکیټ افغان مینوال ئې پر ټاکلو غوراوي کمېټه به دې تورنويو چي زاړه لوبغاړي ئې ملي لوبډله کي اخیستي.

خو بورډ پر خپلي ویبپاڼي په تازه خپور کړيبیانیه کي ویلي، د کرکیټ مینوال باید په دې پوه وي، چي  همیش ښه ځلیدونکي لوبغاړي ددې چانس نه لري، چي ورته په ملي لوبډله کي ځای ورکړل سي.

ذ ایرلینډ په وړاندي درو شل آوریزه سیالیو ته په اعلان سوې لوبډله کي بیا د نورو ځوانو لوبغاړو ترڅنګ عضمت الله عمرزی او قیس احمد هغه ځوان لوبغاړي دي، چي په ملي لوبډله کي د لومړي ځل لپاره ځای ورکړل سوی.

بورډ وايي، چي اداره ئې په دې توانېدلې، چي له ترسره سویو ۶ نولس کلنو کرکټ نړېوالو جامونو څخه افغان کرکټ ملي لوبډله کي په تېرو ۱۰ کلنو کي بېلابېلو لوبغاړو ته د لوبېدو چانس ورکړی.

دافغانستان او ایرلینډ ترمنځ راتلونکې  لوبې ولې,مهمې دي

د کرکټ ملي لوبډله د مارچ میاشتې په لومړۍ لسیزه په هندوستان کې د ایرلېنډ کوربتوب کوي، دواړه لوبډلې درې شل اوریزې لوبې لري.په ۲۰۲۰م کې مخکې له دې چې اسیا جام او نړیوال جام ترسره کړي، د زیاتو شل اوریزو لوبو اړتیا شته.

افغان کرکټ بورډ باید په ۲۰۲۰م کې له مالي امکاناتو څخه په استفادې باید له نورو لوبډلو سره، لکه ایرلېنډ، بنګله دېش، ویسټ انډیز او نورو انډولو لوبډلو سره باید لوبې وکړي، چې لوبغاړي د اسیا جام لپاره په تول وتلل شي.

دا چاره افغان لوبډلې او لوبغاړو ته دوه ګټې لرلی شي:

په افغان لوبغاړو کې به هغه لوبغاړي په ډاګه شي، چې ښه فوم کې دي او راتلونکي کې یوه ښه افغان لوبډله پکې انتخابولی او دوو سترو جامونو ته یې لېږلی شو.

که افغان لوبغاړي اوس پرله پسې لوبلړۍ ولوبوي، نو هغه لوبغاړي به پکې معلوم شي، چې تخنیکي، مثبت او زړور لوبېږي، کله چې لوبغاړي په ډاګه شول، بیا باید غوراوي کمېټه له همدغو مثبتو لوبغاړو متوازنه لوبډله جوړه کړي.

کله چې له دغو لوبغاړو لوبډله جوړه شي، بیا به یې پایله په اسیا جام او نړیوال جام کې حتمن مثبته وي.

دویمه ګټه

که افغان لوبډله له انډولو او لوړو لوبډلو سره مناسب سیریزونه وکړي، نو د مقابلو لوبډلو وړتیاوې به ورته په ډاګه شي، د توپ وهونکو او توپ اچوونکو اطمینان به حاصل شي، د توپ وهونکو د شاټونو سټرانګ او ویک زونونه به وپېژني.

له دې سره سره به افغان توپ وهونکي د نورو لوبډلو بالرانو سره اشنا شي او هم به یې ورسره د مخامخ کېدو وېره ختمه شي.

که بیا له لوبلړیو ور اخوا افغان لوبغاړي  له هندي، پاکستان، انګلستاني او نورو بالرانو سره مخ کېږي بیا به یې وېره نه وي.

له ایرلېنډ د لوبو ګټلو ارزښت

له ایرلېنډ څخه افغان لوبډلې ته د لوبو ګټل څو ګټې لرلای شي.

لومړی د افغان لوبډلې مُرال ځواکمنېږي، له دویمه او درېیمه درجه غوره لوبډلو څخه د لوبو ګټل، د لویو لوبډلو پر وړاندې زمونږ لوبې بیا مرال امیزه کېږي او تر ډېره که لوبه ونه ګټو نو لوبېدل به مو روحاً او فزیکي ډول ارام او پیاوړي وو.

بله خبره له ایرلېنډ څخه د لوبو ګټل موږ ته په رېنکېنګ یا درجه بندۍ کې پرمختګ رامنځته کوي.

خو برعکس که لوبې وبایلو په درجه بندۍ کې منفي تاثیر غورځوي، لوبغاړي مو مُرال له لاسه ورکوي او د سترو لوبډلو پر وړاندې بیا د لوبډلې ثبات له ستونزو سره مخ کېدای شو.

مطلب دا چې نسبت سترو لوبډلو لکه اسټرالیا، انګلستان، پاکستان، هندوستان، نیوزیلېنډ او افریقا په پرتله د ایرلېنډ لوبډله څو ځله کمزورې ده، خو کله چې یوه کمزورې لوبډله مونږ مات کړي، نو بیا مو د سترو لوبډلو پر وړاندې د ګټلو هیلې رژیږي.

نولس کلنه لوبډله تراووم مقام ګټلو وروسته هیواد ته راستنه شوه

۱۹ کرکیټ ملي لوبډله د ۱۹ کلنو ترمنځ د کرکیټ په نړیوال جام کي د ګډون په موخه سویلي افریقا هیواد تللې وه، چي په یاد جام کي ئې تر اووم مقام ګټلو وروسته نن جمعه هیواد ته راستنه شوه.

کرکیټ مليلوبډلي په نړیوال جام کي خپله لومړۍ لوبه د کوربه سویلي افریقا څخه او دوهمه لوبه ئې بیا د متحده عربي آمارتو څخه وګټله، خو خپله درېیمه لوبه، چي ټاکل سوې وه د کاناډا په وړاندي ئې ترسره کړي د باران له امله لغوه اعلان شوه.

تر هغه وروسته افغان ټیم د کواټر پاینل په سیالیو کي د پاکستان سره ولوبېد، چي د یاد هیواد څخه ئې ماته وخوړه او وئې نسو کړای نیمه پایلوبي ته ووځي.

تر یادي ماتي وروسته افغان کرکیټ ۱۹ کلنه لوبډله د پنځم مقام ګټلو په موخه د آسټرالیا سره ولوبېده، چي د یادي لوبډلي څخه ئې هم ماته وخوړه.

وروسته د اوو مقام ګټلو په موخه د سویلي افریقا سره ولوبېده، چي یادي لوبډلي ته ئې ماته ورکړه او په نړیوال جام کي ئې اووم ځای خپل کړ.

د ۱۹ کلنو ترمنځ د کرکیټ د دې نړیوال جام پایلوبي ته هند او بنګله دېش هیوادونو لاره پیداکړې، چي هند په نیمه پایلوبه کي پاکستان او بنګله دېش بیا نیمه پایلوبه کي نیوزیلینډ ته ماته ورکړه.

هندۍ او بنګله دېشۍ لوبډلي به د نړیوال جام پایلوبه بل سبا د یکشنبې په ورځ غرمه ۱۲:۳۰ بجې ترسره کوي.

خو د درېیم مقام ګټلو په موخه سبا شنبه غرمه ۱۲:۳۰ بجې نیوزیلینډ او پاکستان هیوادونه یو د بل په وړاندي لوبیږي.

غفاري دریم ځل لپاره بیا غوره لوبغاړی شو

د کرکټ لوبډله د اوو مقام ګټلو په موخه تېره ورځ د کوربه سویلي افریقا کرکیټ ملي لوبډلي په وړاندي ولوبېده، چي یادي لوبډلي ته ئې په ۵ ویکیټو سخته ماته ورکړه.په یاده لوبه کي افغان سلو توپ اچونکي شفیق الله غفاري یو ځلي بیا ښه توپ اچونه وکړه او د سویلي افریقا ۴ لوبغاړي ئې وسوځول، چي د لوبي غوره لوبغاړی هم وټاکل سو.

غفاري د سویلي افریقا څخه تر لوبي ګټلو وروسته وویل، ډېر خوشحاله یم، چي د دریم ځلي لپاره د لوبي د غوره لوبغاړي جایزه راکول کیږي.

هغه د دې ترڅنګ په پرونۍ لوبه کي د بریا په پار ټولو هیوادوالو ته مبارکي وویله

هغه زیاته کړه ((ټولو هیوادوالو ته د بریا مبارکي وایم، ما تېر ځلي هم د سویلي افریقا ۶ لوبغاړي وسوځول، چي د همدې په خاطر د هغې لوبډلي د ټولو لوبغاړو کمزورې نقطې راته معلومي وې، نو ښه توپ اچونه مي وکړه او ۴ ویکیټي مي واخیستې، زه ډېر خوشحاله یم، چي د درېیم ځلي لپاره د لوبي غوره لوبغاړی ټاکل کیږم))

د ۱۹کلنو په نړیوال جام کي دا د افغانستان شپږمه لوبه وه، چي د یادو لوبو له ډلي ئې درې وګټلي، دوې ئې وبایللې او یوه لوبه ئې بیا د باران له امله لغوه اعلان سوه.

په یادو درو ګټلو لوبو کي درې سره ځلي په افغان لوبډله کي سلو توپ اچونکی شفیق الله غفاري د لوبي غوره لوبغاړی وټاکل سو.

هغه په ګروپي پړاو کي د سویلي افریقا ۶ او د متحده عربي آماراتو ۵ لوبغاړي وسوځول او دادئ پرون ئې بیا د سویلي افریقا ۴ لوبغاړي وسوځول.

د یادونی وړ ده چې غفاري د دې ترڅنګ د آسټرالیا په وړاندي لوبه کي هم یوه ویکیټ واخیسته او په نړیوال جام کي ئې خپلي ویکیټي ۱۶ ته رسولي