د ملګرو ملتونو یو لوړ پوړی چارواکی وايي، د جګړو سیمو ته د هر ډول وسلو انتقال باید قانوني وي
د روسیې او اوکراین د جګړې په دوام، د بې وسلې کولو په چارو کې د ملګرو ملتونو استازي مرستیال، ادیجي ایبو ویلي چې د جګړې سیمو ته د وسلو بې رویې لېږد د تاوتریخوالي د زیاتېدو او ملکيانو ته د زیان اړولو لامل کېږي.
د روسیې له برید وروسته اوکراین ته د پوځي مرستو برابرول او د وسلو لېږد، پنجشنبه د جولای پر ۲۵مه د ملګرو ملتونو د امنیت شورا ناستې اصلي تمرکز و.
اوکراین ته ورکول کېدونکي وسلې
ایبو زیاتوي: «د وسلو او مهماتو هر ډول لیږد باید د نړیوالو قوانینو له تطبیق شوي چوکاټ او د امنیت شورا اړوندو پرېکړولیکونو سره سم ترسره شي.»
د ملګرو ملتونو دې چارواکي همداراز ویلي چې د معلوماتو پر بنسټ، په دغو وسلو کې جنګي ټانکونه، زغروال جنګي تجهیزات، چورلکې، سپکې وسلې، د پرسونل ضد ماينونه او نور مهمات شامل دي.
نور ولولئ: ستولتنبرګ وايي د اوکراین واقعي ځای په ناټو کې دی
نور ولولئ: ناټو چین ته خبرداری ورکړی چې د اوکراین خلاف روسیې ته وسلې ورنه کړي
نور ولولئ: ناټو د “اوکراین پلان” لپاره د ۱۰۰میلیارد ډالرو پر ورکړې بحث کوي
هغه څرګنده کړې : «سربېره پردې، داسې راپورونه شته چې هېوادونه د روسیې وسلهوالو ځواکونو ته د بې پیلوټه الوتکو، بالیسټیک توغندیو او مهماتو په څېر وسلې لیږدوي او دا وسلې په اوکراین کې کارول کېږي.»
د ملګرو ملتونو نوموړي چارواکي ویلي چې د نورو بې ثباتۍ او ناامنۍ د مخنیوي په موخه د کلیدي وسلو د لېږد مخنیوي لپاره د لا ډېرو اقداماتو ترسره کول اړین دي.
د وسلو د کنټرول په برخه کې د مسئولیتونو ادا کول
هغه د شورا له غړو هېوادونو غوښتي چې د وسلو د کنټرول په برخه کې خپل مسوولیتونه سرته ورسوي.
د بې وسلې کولو په چارو کې د ملګرو ملتونو د استازي مرستیال ویلي چې په اوکراین کې د روسیې د یرغل له پیل راهیسې ۱۱زره او ۴۳۰ کسان وژل شوي او ۲۳زره ۲۲۸ نور ټپیان دي.
د روسیې او اوکراین ترمنځ د جګړې له پیله شاوخوا درې کاله تېر شوي او تر اوسه د دواړو هېوادونو ترمنځ د سولې د خبرو د پېل او د جګړې د پای ته رسونې هڅې ناکامې شوې دي.
مسکو هوډ لري چې د اوکراین جګړه نوره هم وغځوي، ځکه روسیه وايي، زموږ جګړه یوازې له اوکراین سره نه، بلکې د اوکراین له ملاتړ کوونکو سره ده.
د یادونې وړ ده چې اوکراین د مسکو په مقابل کې د امریکا او غربي هېوادونو لخوا حمایه کېږي.
