ایراني رسنیو راپور ورکړ چې د ایران ولسمشر ابراهیم رئیسي او بهرنیو چارو وزیر امیر عبداللهیان په چورلکه کې مړه شوي دي
د ایران مشر آیت الله علي خامنه يي د خپل هیواد ولسمشر ته په هوايي پېښه ژوره خواشیني ښکاره کړه.
د ایرنا خبري اژانس د راپور له مخې، خامنه يي ویلي: د دغو ټولو خدمتګارانو لپاره دعا وکړئ؛ د ایران ملت دې اندېښمن نه وي. د هیواد په چارو کې به هیڅ ستونزه پېښه نه شي.
ایراني رسنیو د خپل ولسمشر ابراهیم ريیسي پخوانی عکس خپور کړی و چې له څرخکې کښته کېږي.
اوس ایراني چارواکي وايي چې د رييسي د څرخکې د لوېدو له ځایه خبر نه دي او د شپې تیاره سبب شوې چې د پلټنې چارې یې ټکنۍ شي.
ایراني چارواکو د ريیسي لپاره د دعا غوښتنې
وروسته له دې چې تسنیم خبري اژانس د ريیسي پخوانی عکس د هغه د تازه عکس په نوم خپور کړ، اسراییلي رسنیو ادعا وکړه چې د ایران د ولسمشر څرخکه لوېدلې او ريیسي غالباً وژل شوی دی.
له ريیسي سره په څرخکه کې د ایران د باندنیو چارو وزیر امیر عبدالهیان هم سپور و.
نور ولولئ: د ایران ولسمشر ته د طالبانو په غبرګون وايي پاروونکې خبرې دې څوک نه کوي
نور ولولئ: د ایران ولسمشر اسلام اباد ته پر رسمي سفر تللی
د ایران دولتي خبري اژانس، ایرنا د سپاه پاسدران د قوماندان په قول راپور وکړ چې د ولسمشر د څرخکې د لوېدو دقیق ځای پېژندل شوی دی.
د ختیځ اذریایجان د سپاه پاسداران قوماندان په دې اړه وویل:«د څرخکې او د هغې د یوه عمله د موبایل ټېلفون سیګنال د پېښې له ځایه ترلاسه شوی دی.»
ده زیاته کړه چې پولیس د دغه ځای لور ته، چې سیګنالونه ورڅخه ترلاسه شوي دي، روان شوي دي.
له ایران سره د ترکیې همکاري
له پېښې وروسته ترکیې ایران ته د پلتنې وسایل ولېږل او روسیې، قطر او سعودي عربستان د مرستې وړاندیزونه وکړل.
خو د ایران حکومت له اروپايي اتحادیې د مرستې غوښتنه وکړه.
د ایران ولسمشر په څه ډول څرخکه کې سپور و؟
د ایران د ولسمشر او باندنیو چارو وزیر د سپرلۍ څرخکه په اویایمه لسیزه کې د امریکا په ټکساس کې جوړه شوې وه.
له دې هیلي کوپټر څخه د مرستو رسولو، اور وژنې او ترانسپورت په برخو کې کار اخیستل کېږي.
دا څرخکه دوه ماشینونه لري او ۱۵ تنه سپرلي او څه باندې ۲ ټنه بار وړلی شي.
دا څرخکه په ساعت کې ۲۲۰ کیلومتره مزل کوي او ۵ کیلومتره لوړېږي.
