د خبریالانو د ملاتړ سازمان وايي، طالبان هغه څېرې رسنیو ته د بحثونو لپاره معرفي کوي چې ددوی په ګټه غږیږي
هاخوا شنونکي وايي، طالبان په تدریجي ډول هڅه کوي چې په افغانستان کې د رسنیو یا هغو نشریو مخه ډب کړي چې د افغانستان پر وړاندې د دوی پر تګلارو او سیاستونو نیوکه کوي او اصلاح یې غواړي.
د افغانستان له خبریالانو د ملاتړ سازمان پر رسنیو د طالبانو د نویو بندیزونو په غبرګون وایي، چې دغه ډله د خپلې خوښې شنونکي په سیاسي خپرونو کې د ګډون په موخه رسنیو ته معرفي کوي.
یاد سازمان نن د یوې اعلامیې په خپرولو د طالبانو دا کړنه یو بل سانسور او د بیان پر ازادۍ جدي بندیز وباله.
د رسنیو په اړه د طالبانو نوي پرېکړه
د افغانستان له خبریالانو د ملاتړ سازمان د رسنیو پر سیاسي خپرونو د طالبانو د نوي بندیز په اړه د اندېښنې په څرګندولو سره د رسنیو له ملاتړو سازمانونو غوښتي، چې په دې برخه کې قاطع دریځ غوره کړي.
دغه سازمان په خپله اعلامیه کې لیکلي: «له ټولو هغو بنسټونو چې د بیان د ازادۍ، رسنیو او د بشري حقونو ملاتړ کوي غواړو، چې د طالبانو د دې ځپونکو پرېکړو پر وړاندې کلک او قاطع دریځ غوره کړي.»
نور ولولئ: تازه؛ طالبانو درې خبریالان زندان ته اچولي دي
نور ولولئ: طالبانو په خوست کې په راډیوګانو کې د نجونو پر ټیلیفوني اړیکو بندیز ولګاوه
نور ولولئ: طالبان په افغانستان کې فیسبوک تړي
یاد سازمان دغه راز له نړۍوالې ټولنې غواړي، چې د طالبانو دا اقدامات بې ځوابه پرېنږدي.
یوې سرچینې تېره ورځ وویل، چې طالبان غواړي په افغانستان کې پر کورنیو رسنیو د بندیزونو نوې څپه پیل کړي.
طالبانو بیا د دې تازه بندیزونو د عملي کېدو په تړاو تر اوسه په رسمي توګه څه نه دي ویلي.
د سانسور پرله پسې هڅې
په افغانستان کې پر رسنیو د طالبانو له محدودیتونو سره – سره ځینې رسنۍ ګردي مېزونه او سیاسي خپرونې جوړوي، خو طالبان له دغو سیاسي خپرونو او تحلیلونو سخته اندېښنه لري او دغه ډله غواړی، چې د دې خپرونو له بندولو سره سانسور نور هم زیات کړي او کنټرول شوي معلومات خپاره شي.
دا پر رسنیو د طالبانو نوی بندیز نه دی، دغې ډلې تر دې وړاندې هم د لسګونو فرمانونو په صادرولو سره د رسنیو پر فعالیتونو پراخ محدودیتونه وضع کړي دي.
څو ورځې وړاندې د طالبانو د اطلاعاتو او کلتور وزارت د خپرونو چارو معینیت چارسمبالي ضیاء الحق حقمل ویلي وو، چې رسنۍ دې د هغو بهرنیو کسانو راپورونه نه را نقلوي، چې د افغانستان په اړه ناسم تحلیلونه کوي.
بل خوا دغې ډلې په دې وروستیو کې په کندهار ولایت کې د ملا هبت الله په امر د ملي ټلویزیون پر خپرونو بندیز لګولی او د بندیز لامل هم په دې رسنۍ کې د ژوندیو انځورونو خپرول بلل شوی دی.
