بایډن جي۲۰غونډه کې د چین ولسمشر پر نه ګډون کولو خواشيني ښوده
![gettyimages 1244770124](https://afghannow.net/wp-content/uploads/2023/09/GettyImages-1244770124-348x196.jpg)
د چین ولسمشر (شي جینپینګ) د جی۲۰ هېوادونو سرمشریزه کې ګډون نه دی کړی
د امریکا ولسمشر جو بایډن ویلي د خپل چیني سیال ‘شي جېنپېنګ’ پر دې پلان خواشینی دی چې هند کې د نړۍ د شلو سترو اقتصادي هېوادونو یا ‘جي۲۰’ په راتلونکې سرمشریزه کې ګډون نه کوي.
رویټرز خبري اژانس ویلي، تمه ده چې په دې سرمشریزه کې د بېجېنګ استازولي لومړی وزیر ‘لي چیانګ’ وکړي.
ښاغلي بایډن رسینو ته ویلي “خواشینی یم… خو ورسره وبه ګورم.”
نور ولولئ: چین کې هغو نجونو ته چې له ۲۵ کالو کم عمر کې واده کوي، جایزې ورکوي
رپوټونو کې ویل شوي چې د جي۲۰ سرمشریزه به راتلونکې اونۍ (د سپتبمر پر ۹مه او ۱۰مه) نوي ډیلي ترسره شي.
د چین او امریکا ولسمشرانو وروستی ځل تېره کال په اندونیزیا کې د دې سرمشریزې پر مهال کتلي وو.
د چین ولسمشر د ګډون ژمنه کړې وه
ښاغلي شي مخکې ویلي و چې په نوي ډیلي کې دې مهمې کلنۍ غونډې ته ورځي، خو د چین بهرنیو چارو وزارت پنجشنبه خپله ورځنۍ خبري غونډه کې د نوموړي سفر تایید نه کړ.
له دې سره هممهاله رپوټونو کې دې غونډې ته پر چمتووالي د بوختو سرچینو په حواله ویل شوي، چې د چین ولسمشر سږ کال په دې سرمشریزه کې د ګډون پلان نه لري.
دا په داسې حال کې ده چې د چین او هند ترمنځ اړیکې په دې وروستیو کې لا نورې ترینګلې شوې دي.
دغه هېوادونه پر نورو مسایلو سربېره همالیا سیمه کې د لانجمنې پولې پر سر هم له یو بل سره تقابل کې دي.
چین تېره اوونۍ یوه نقشه خپره کړه چې د هند اروناچال پردېش ایالت او اکسای چین تراړه یې پکې د خپلې خاورې برخه انځور کړې وه.
دغه ګام ته د نوي ډیلي جدي غبرګون
د چین او هند د سرحدي ځواکونو ترمنځ وخت ناوخت پر لانجمنه پوله نښتې هم کېږي
د امریکا او چین ولسمشر راتلونکی نومبر سنفرانسیسکو کې د اسیا پاسېفیک د اقتصادي همکاریو د مشرانو غونډه کې هم د لیدو فرصت لري.
د یادونې ده چې د تېر کال اوږدو کې د چین او امریکا اړیکې هم له ستونزو سره مخامخ وې.
نور ولولئ: پاکستان کې ناامني؛ پر چینايي انجینرانو برید شوی
د دی لوی لامل دا و چې واشنګټن د اندونیزیا بالي ټاپو کې د ښاغلي بایډن او ښاغلي شي تر کتنې شاوخوا دوه میاشتې وروسته وویل چې خپله فضا کې یې د چین یو څارونکی بالون نسکور کړی دی.
ټاکل شوې د نړۍ شپږ نور مخ پر ودې هېوادونه ارجنټاین، مصر، ایران،اېتیوپیا، سعودي عرب او متحد عربي امارات هم راتلونکې جنورۍ کې له دغه سازمان سره یو ځای شي.