د طالبانو حکومت د عامې روغتیا وزارت وايي، اوس مهال په دغه هیواد کې د کرونا ویرویس مثبتو پېښو کې د پام وړ کموالی راغلی دی. د یاد وزارت ویاند جاوید هژیر د یکشنبې په ورځ اپرېل لسمه (وري ۲۱) وویل چې یوازې تیره اونۍ په ټول هیواد کې د کرونا ویروس ۳۰۴ مثبتې پېښې ثبت شوي دي. هغه زیاته کړه چې په دغه موده کې په کرونا ویروس اخته اووه ناروغان مړه شوي دي.
نوموړي زیاته کړه چې د دوی څېړني ښيي چې په کابل او ځینو نورو ولایتونو کې د کرونا ویروس پېښې د کمېدو په حال کې دي او ممکن په راتلونکو اونیو نورې هم کمې شي. ښاغلي هژیر وویل چې د کرونا ویروس ارقام او شمېرې فعلاً ډیرې کښته دي، او د فبروري میاشتې له دوهمې اونۍ څخه یې بیا تر دا مهاله کښته شوي دي.
دا په داسې حال کې ده چې د فبروري میاشتې له پيل څخه بیا د دغه میاشتې تر پایه پوري په کابل او ولایتونو کې د کرونا ویروس۱۰۲۷۶مثبتې پېښې ثبت شوي وې او شاوخوا ۲۰۰ نارغان ورڅخه مړه شوي و.
د طالبانو حکومت د روغتیا وزارت په داسې حال کې د کرونا ویروس د مثبتو پېښو کمېدو خبر ورکوي چې تر دې مخکې روغتیايي چارواکو ویلي و چې دوی د اومیکرون کرونا ویروس د تشخیص وسایل نلري.
نور یی ولوله | ډيورنډ کرښې ته څېرمه تازه شخړه
کرونا ویروس د لومړي ځل لپاره د ۲۰۱۹ کال په ډسمبر میاشت کې د چین د هوبي ایالت په ووهان ښار کې پيدا شو او وروسته نورې نړۍ ته هم خپور شو.
د امریکا د جانس هاپکینز پوهنتون د معلوماتو په اساس تر دا مهاله په نړۍ کې نژدې ۴۹۹ میلیون کسان په کرونا ویروس اخته شوي چې له شپږ میلیون او ۱۷۶زره کسان مړه شوي دي.
